Pang-9 sunod na titulo ng Adamson sa UAAP women’s softball

MANILA, Philippines — Nakahugot ng magandang laro ang Adamson University mula kina Arianne Vallestero upang igupo ang University of Santo Tomas, 11-2 tungo sa kanilang ikasiyam na sunod na titulo sa UAAP Season 81 softball tournament sa Rizal Memorial Baseball Stadium.

Isang transferee mula sa National University, tinapos ni Vallestero ang kanyang collegiate stint sa pagdedeliber ng dalawang hits at tatlong runs sa title clincher.

“Dito ko siya kaila-ngan sa year na ito. Siya ang nagdala ng game na ito. Lahat ng individual awards halos kinuha niya,” sabi ni coach Ana Santiago na niyakap si  Vallestero  matapos makopo ang kanilang pang-18 cham-pionship overall.

Si Vallestero ang season MVP at siya ring Best Hitter (.556), Best Slugger (.972) at Most RBIs (16).  Kahati siya sa Most Homerun award ni Charlotte Sales ng UST sa naitalang tatlo at Most Stolen Bases kasama ang kanyang teammate na si Angelu Gabriel sa naitalang anim.

“Wala akong pressure. Hindi ako kinakabahan. Ini-enjoy ko lang. All out na rin ako,” sabi ni Vallestero.

Nagtala naman si Gino Tantuico ng two-run homer para sa 7-3 panalo ng Ateneo na nakahirit ng do-or-die Game 3 kontra sa La Salle sa men’s division.