Kasado na lahat para sa 30th SEAG

MANILA, Philippines — Inaasahan ang mahigit 12,000 hanggang sa 15,000 atleta, officials at guests ang dadalo sa pagdaraos ng 30th Southeast Asian Games na nakatakdang ganapin sa Nobyembre 30 hanggang sa Disyembre 10 sa tatlong venues kung saan ang New Clark City sa Tarlac ang main hub.

Bukod sa Clark, ang ibang venues na kinukunsidera ay Metro Manila at Subic Freeport Zone ngunit ginawang main hub ang New Clark City sa Capaz, Tarlac kung saan nagpagawa ang Clark Bases Conversion Development Authority ng athletes village.

Sa Clark gaganapin ang athletics, aquatics events, shooting, archery, baseball, softball, lawn bowls habang sa Subic ang taekwondo, weighlifting, fencing, sepak takraw, triathlon, duathlon, sailing at ibang water sports.

Ang mga events na gaganapin sa Metro Manila ay ang football sa Rizal Memorial Football field. Volleyball sa Mall of Asia Arena, gymnastics sa SMX Trade, basketball sa Araneta Coliseum at boxing sa Cuneta Astrodome.

 Sabi ni Philippine Olympic Committee president Ricky Vargas, napag-usapan sa dalawang araw na Southeast Asian Games Federation Council meeting ang inisyal na 34 sports ang idaraos sa 30th edisyon na gaganapin dito sa Pilipinas sa ika-apat na pagkakataon.

“Our Sea Games Federation Council meeting is very successful and very fruitful,” sabi ni Vargas sa press conference kahapon sa Shagrila Hotel sa Bonifacio Global City na dinaluhan din nina POC chairman at Rep. Bambol Tolentino, POC secretary-general Patrick Gregorio at Indosian Olympic Committee chairman Erick Thohir.

Itinalaga rin si Dr. Raul Canlas bilang pinuno ng Medical Committee habang si Tatz Suzara bilang excecutive-director ng Philippine Sea Games Organizing Committee na pinamunuan ni chairman at DFA secretary Alan Peter Cayetano at dating POC president Celso Dayrit bilang executive committee chairman at Tom Carrasco bilang chairman ng sports and rules committee.

Unang ginanap dito ang Sea Games noong 1981 at sinundan sa taong 1991. Ang huli ay noong 2005 kung saan nagkampeon ang Team Philippines sa unang pagkakataon.

Idaraos din ang archery, badminton, billiards, tenpin bowling, cycling, equestrian, polo, fencing, football, golf, judo, jiujitsu, kara-tedo, sailing, sepak takraw, shooting, squash, taekwondo, volleyball, weighlifting, wrestling, kurash, wushu, arnis, dancesports at muay.

Ayon kay Vargas, lahat ng 11 bansang kalahok ay may hanggang Hulyo 13, pa maaaring magsumite ng mga hihilinging additional sports.