Terrence ‘at home’ agad sa TNT
MANILA, Philippines — Isang laro pa lamang ngunit waring ‘at home’ na kaagad si Terrence Romeo sa kanyang bagong koponan na TNT Katropa.
Iyan ay matapos daigin ng Tropang Texters ang kanyang dating koponang Globalport Batang Pier, 128-114, sa pagbubukas ng 2018 PBA Commissioner’s Cup noong Linggo sa Smart Araneta Coliseum.
“Sobrang saya. Kakaiba ‘yung atmosphere dito sa bago kong team. Tuwang-tuwa ako at part na ko ng TNT team dahil lahat nagtutulungan sa isa’t isa,” ani Romeo.
Ito ay kahit hindi niya naipamalas ang tunay na laro matapos magkasya lamang sa 11 points mula sa malamyang 4-of-13 shooting na sinahugan pa ng limang turnovers.
Hindi ito masyadong ininda ng TNT dahil pitong manlalaro ang kumamada ng 10 points pataas sa pangunguna ng bagong ka-partner ni Romeo na si Jayson Castro na nagbuslo ng 21 points at 10 assists.
Aminado si Romeo na nangangapa pa siya sa bagong koponan ngunit tiwalang makukuha niya rin ang dating bagsik sa tulong ng kanyang mga bagong kasangga.
“Medyo kinakapa ko pa. Nagpapasalamat ako kay kuya Jayson (Castro) and kay coach Nash (Racela). Lagi akong gina-guide. Naninibago ako ulit. Sinasabi nila sa akin na sige, makukuha mo ulit iyan, babalik ulit iyan.”
Naitampok si Romeo sa isang blockbuster trade kung saan napunta siya sa TNT kasama si Yousef Taha kapalit si Mo Tautuaa at dalawang future picks.
Ang naturang trade ang nagwakas sa limang taon niya sa Globalport matapos mapili bilang No. 5 overall pick noong 2013 PBA Rookie Draft.
Inamin ni Romeo na wala siyang sama ng loob sa dating koponan.
“Iyon naman ang buhay ng PBA player eh. Hindi namin alam kung san kami mapupunta or hindi namin alam kung san kami next. Ang importante, kung nasan kami, maging professional kami, ibigay namin best namin, ‘yung makakaya namin,” ani Romeo.
Na-miss din ni Romeo ang kaibigang si Stanley Pringle. AD
- Latest