Golden State abante na sa 3-0

SAN ANTONIO — Sinamantala ng Golden State ang pagluluksa ng Spurs sa pagkamatay ng asawa ni head coach Gregg Popovich na si Erin upang makalapit sa pagwalis ng kanilang first-round playoff series.

Nagposte si Kevin Durant ng 26 points, 9 rebounds at 6 assists para pamunuan ang Warriors sa 110-97 panalo sa Spurs.

Apat na dekadang kasal sina Erin at Gregg Popo-vich at may dalawang anak at dalawang apo.

Hindi gumawa ng video tribute o anumang moment of silence ang San Antonio team para kay Erin upang maging ordinaryo ang laro ng mga players.

“We are all hurting,” wika ni San Antonio ve-teran guard Manu Ginobili matapos ang kanilang morning shootaround. “We want to be next to Pop, we want to support him, but we’ve got to go out there and compete today. But, for sure, we are toiling. It’s not an easy day to be here.”

Si San Antonio assistant Ettore Messina ang pansamantalang pumalit kay Popovich.

Maaari nang wakasan ng Warriors ang kanilang serye ng Spurs sa panalo sa Game Four sa Lunes (Manila time) sa San Antonio.

Sa New Orleans, humakot si Nikola Mirotic ng career playoff-best 30 points bukod pa ang 8 rebounds, 3 steals at 1 block para pa-ngunahan ang Pelicans sa 119-102 panalo sa Portland Trail Blazers at kunin ang 3-0 lead sa kanilang first-round playoff series.

Sa Miami, humataw ang nakamaskarang si Joel Embiid ng 23 points sa kanyang postseason debut at nagdagdag sina Marco Belinelli at Dario Saric ng tig-21 markers para tulu-ngan ang Philadelphia sa 128-108 paggiba sa Heat at agawin ang 2-1 lead sa kanilang Eastern Conference first-round series.