Cojuangco, Candelaria kinapos sa ginto
MANILA, Philippines — Kinapos sa gold medal sina national archer Amaya Paz-Cojuangco at taekwondo jin Juliana Mykhail Candelaria sa kani-kanilang final matches sa 20th Asian Games kahapon sa Aichi-Nagoya, Japan.
Nagkasya sa silver si Cojuangco dahil sa kanyang 137-139 kabiguan kay Nurisa Dian Ashrifah ng Indonesia sa women’s individual compound finals.
Tinapos ng 40-anyos na national team veteran ang 12-taong paghihintay ng bansa sa Asiad archery medal matapos ang bronze ni Paul Marton Dela Cruz sa men’s individual compound noong 2014 edition sa Incheon, South Korea.
May silver rin si Candelaria sa women’s individual poomsae event ng taekwondo sa nahakot niyang 9.1300 points.
Nag-ambag ng bronze si Jeus Gabriel Yape sa kanyang itinalang 9.0900 points sa men’s individual poomsae.
Sa tennis, nakuntento sa bronze si World No. 18 Alex Eala matapos sapawan ni No. 85 Wang Xiyu ng China, 6-3, 3-6, 2-6, sa kanilang women’s singles semifinal match.
May tatlong golds, limang silvers at 14 bronzes ngayon ang Pilipinas para sa No. 18 spot sa medal tally na binabanderahan ng China sa nakolektang 152 golds, 71 silvers at 61 bronzes kasunod ang host Japan (53-77-78), South Korea (30-30-51), Uzbekistan (16-20-19) at Thailand (12-11-15).
“May tatlong simba up to Sunday morning. Last three days, still hoping for more golds,” wika ni Philippine Olympic Committee (POC) president Abraham “Bambol” Tolentino.
Muntik makasingit ng bronze si Marc Alexander Lim kundi lamang siya naisahan ni Seonghyeon Joo ng South Korea sa men’s -69kg division ng jiu-jitsu.
Sa women’s beach volleyball, nadiskaril ang pagpasok nina Alas Pilipinas duo Sofiah Pagara at Khy Progella sa finals nang matalo kina Taravadee Naraphornrapat at Worapeerachayakorn Kongphopsarutawadee ng Thailand, 21-23, 18-21, sa semifinals.
May tsansa pa sina Pagara at Progella para makuha ang kauna-unahang Asiad beach volleyball medal ng bansa sa pagharap kina Cao Shuting at Dong Jie ng China sa bronze medal match ngayong umaga.
- Latest
