Oftana pasok sa Gilas Final 12
MANILA, Philippines — Walang Justin Brownlee na masisilayan para sa Gilas Pilipinas na dedepensahan ang korona sa 2026 Asian Games na magsisimula na sa Biyernes sa Nagoya, Japan.
Kaya naman ipapasok sa lineup si Calvin Oftana upang maging ika-12 miyembro ng Gilas Pilipinas sa Asian Games.
“Calvin was always on the list to play, but we were uncertain of his health status. He has since returned to TnT’s practice and is good to go,” ani Cone.
Nakalaan sana ang huling silya sa Final 12 ng Gilas Pilipinas kay Brownlee o kay Kai Sotto.
Ngunit parehong hindi maglalaro sina Brownlee at Sotto na may kani-kanyang kadahilanan.
Kasalukuyang nagpapagaling sa injury si Brownlee sa Amerika habang may inaasikaso naman si Sotto para sa kanyang pangarap na makapaglaro sa NBA.
Dumating na si Oftana sa Japan para makasama ang Gilas Pilipinas.
Hindi naman magiging mahirap para kay Oftana na mag-adjust dahil naging bahagi na ito ng Gilas sa mga nakalipas na windows.
“Because of the system we are running and his previous experience in the window teams, he’s a plug and play player and will fit right in,” ani Cone.
Hindi nakapaglaro si Oftana sa second round ng FIBA World Cup Asian Qualifiers dahil sa injury.
Subalit nakarekober na ito at handang tulungan ang Gilas sa kampanya nito sa Asian Games.
Malaking tulong si Oftana lalo pa’t nagpalakas ang mga Asian teams kabilang na ang Bahrain na unang makakalaban ng Gilas bukas (Biyernes).
- Latest
