Cebu mipakurat sa Abra sa MPBL

CEBU, Philippines — Ang Cebu Greats nagsandig sa eksplosibong salida ni Mark Meneses ug sa pagkamabayanihon ni  Kint Ariar aron tumbahon ang defending champions Abra Solid North Weavers, 74-70, sa SportsPlus Maharlika Pilipinas Basketball League (MPBL) 2026 Season niadtong Lunes sa gabii, Agosto 31, didto sa Ynares Center Montalban sa Rizal.

Si Meneses miposte og solidong double-double nga 26 puntos ug 14 ka rebounds nga iyang gisukipan og upat ka assists, duha ka steals ug duha ka blocks sa dihang ang Greats miligid sa ikalima nilang sagunson nga daog human naparot sa duha nila ka sunod-sunod nga home games aron birahon ang solong liderato sa South Division uban ang 19-5 win-loss rekord.

Sa dihang nagtabla ang iskor 68-68, si Ariar nanghugyaw human siya mipasud sa krusyal niyang itsa nga nakapalabaw sa Cebu sa hingpit sa pinal nga 42 segundos ug dayon milansang og duha ka free throws nga maoy nagsilyo sa kulbahinam nilang daog sa katapusang 7.5 segundos. Si Ariar mitapos uban ang otso puntos ug duha ka rebounds samtang si Dhon Reverente mipupo og 16 puntos ug upat ka rebounds sa dihang gipakgang sa Cebu ang 19 ka sagunson nga daog sa Abra.

Si Dave Ildefonso miharos og 20 puntos, 11 ka rebounds ug duha ka assists samtang si DJ Fenner midugang og 18 puntos, unom ka rebounds, tulo ka assists ug duha ka steals alang sa Abra, nga napildi sa ikaduha pa lamang nga higayon sa 23 ka duwa.

Bitbit ang 21-2 nga baraha, ang Weavers nag-una pa gihapon sa North Division.