Heat padayong nanginit, mibihag sa Celtics

CEBU, Philippines — Ang Miami Heat mipakgang sa siyam ka sagunson nga daog sa defending champion Boston Celtics, 124-103, sa NBA kagahapong adlawa didto sa TD Garden sa Boston, Massachusetts.

Si Tyler Herro mikadlit og 25 puntos aron pangulohan ang pito ka players nga mirehistro og figures alang sa Heat, nga milansang sa ikaunom nilang sunod-sunod nga daog.

Bitbit ang 35-41 nga baraha, ang Heat ikasiyam karon sa Eastern Conference ug dako kaayo ang ilang puruhan nga maka-apil sa play-in tournament.

Didto sa Cleveland, sila si Donovan Mitchell ug Jarrett Allen nagkumbinar og 48 putnos sa dihang ang Cavs mi-rally human mabiyai og 15 puntos aron bughaon ang New York Knicks, 124-105.

Ang Cavs, nga sud na sa playoffs, miinat pa sa ilang labaw sa liderato uban ang 61-15 rekord.

Samtang ang Knicks ikatulo gihapon sa East uban ang 48-28 nga marka.

Labaw sila og tulo ka duwa sa ikaupat nga Indiana Pacers, nga misaka sa ilang baraha ngadto sa 45-31 human gipayaka ang Charlotte Hornets, 119-105.

Sa West, ang Oklahoma City Thunder miinat sa nagkadena nilang daog ngadto sa 11 ka duwa human gipaluhod ang Detroit Pistons, 119-103, didto sa ilang korte.

Ang nag-unang kandidato pagka-MVP nga si Shai Gilgeous-Alexander miharos og 33 puntos, si Jalen Williams mi-iskor og 23 samtang si Chet Holmgren miamot og 22 puntos ug 11 ka rebounds alang sa Thunder, nga segurado nang top seed sa West.

Nagsunod kanila ang Houston Rockets, nga miangkon na og luna sa playoffs human gilampornas ang nangiwit nga Utah Jazz, 143-105.

Ang Rockets nakabentaha og tulo ka duwa sa Los Angeles Lakers ug Denver Nuggets, nga nakatilaw og 113-106 nga kapildihan sa mga kamot sa San Antonio Spurs.