Nuggets, knicks mipaduol sa NBA conference finals

CEBU, Philippines — Ang defending champion Denver Nuggets ug ang New York Knicks parehong miposte og 3-2 nga labaw sa serye batok sa tagsa-tagsa nila ka mga karibal hinungdan nga nanginahanglan na lang sila og usa ka daog aron mo-abante sa NBA conference finals.

Sa West, ang Nuggets mipaluhod sa Minnesota Timberwolves, 112-97, sa ikatulong sunod-sunod nga higayon.

Human gipakuratan sa Wolves sa nag-unang duha ka duwa sa serye, ang Nuggets nanoktok na karon aron mobalik sa West Finals.

Nadasig human nadawat ang ikatulo niyang tropeyo isip MVP sa wala pa ang duwa, si Nikola Jokic mipaulbo og 40 puntos alang sa Nuggets.

Si Jokic mibubo og 19 puntos sa first half aron tabangan ang Nuggets pagrehistro og 50-44 nga bentaha sa halftime.

Ang Wolves milusad og 11-3 rally sa sayong bahin sa ikatulong kuwarter apan si Jokic mirapido og laing 16 puntos aron inaton og balik ang labaw sa Nuggets ngadto sa 14 puntos, 88-74.

Gawas sa maanindot nilang opensa, milampos sab ang Nuggets pagpahilom ni Anthony Edwards, nga nalimitahan ngadto lamang sa 18 puntos sa kampo sa Wolves.

Didto sa East, si Jalen Brunson nabalikan sa iyang pagkamangtas sa dihang gidominar sa Knicks ang Indiana Pacers, 121-91, aron kontrolahon og balik ang ilang serye.

Si Brunson mipabuhagay og 44 puntos uban ang pito ka assists ug upat ka rebounds.

Gilat-an sab sa Knicks ang Pacers sa linangkatay sa bola kortesiya nilang Isaiah Hartenstein ug Josh Hart nga nagkumbinar og 28 ka rebounds alang sa New York.

Kon ugaling modaog sa Game 6 karong Sabado didto sa Indianapolis, ang Knicks motikang sa Eastern Conference finals sa unang higayon sud sa 24 ka tuig. (BANAT NEWS)