Mga boksidor sa ARQ manulong sa Japan
WBC, WBO regional titles tirada nilang Piala ug Gura
CEBU, Philippines — Ang duha ka mga way pildeng pambato sa ARQ Stable nga sila si Rodex “The Tank” Piala and Yeroge “The Scientific” Gura parehong nangandam sa malisud nga away alang sa kampiyonato sa labing una nilang pag-asdang sa langyawng lapyahan sunod bulan didto sa Japan.
Matud pa ni ARQ Sports press relations officer Roger Justine Potot, si Piala mohagit sa Hapon nga defending champion nga si Kenji Fujita alang sa World Boxing Organization (WBO) Asia Pacific featherweight belt sa pasundayag nga gipasiugdahan sa Teiken Promotions karong Hunyo 1 didto sa makasaysayanong Korakuen Hall sa Tokyo.
Ang 29-anyos nga Piala nagkupot og perpektong 10-0 rekord uban ang 1KO samtang si Fujita wala pa say tatsa sa unom ka away uban ang 3KOs.
Si Piala midaog pinaagi sa unanimous decision batok ni Marjhun Tabamo sa miagi niyang pagkatkat sa ring atol sa “Kumong Bol-Anon XII” sa PMI Bohol Boxing Promotions niadtong Agosto 15 sa miaging tuig didto sa dakbayan sa Tagbilaran City.
Sa iyang bahin, si Fujita mibuntog sa kababayan ni Piala nga si Joseph Ambo pinaagi sa unanimous decision aron sakmiton ang WBO regional title niadto lamang Enero 20 didto sa Korakuen Hall.
Sa kinatibuk-an, ang Hapon nagbitbit og 5-0 nga marka batok sa mga Pinoy diin si kanhi WBO Oriental super bantamweight titleholder Jio "Santino" Santisima maoy labing sikat niyang nabiktima.
Sa laing bahin, si Gura mosuway paglangkat sa korona sa World Boxing Council (WBC) Youth super flyweight division sa dihang iyang sangkaon si Ayumu Sano sa Hunyo 23 didto sa Twin Messe sa Shizuoka, Japan.
Si Gura nagtangag og 8-0-1 nga baraha uban ang 3KOs, samtang ang wa say pildeng si Sano naglukdo og 8-0-1 rekord uban ang 4KOs.
Si Sano naka-atbang na og duha ka Pinoy nga mga kontra diin pulos kini niya gipalukapa.
Gipakamang niya si Romeo Tenorio sud sa duha ka hugna ug dayon gipatikangkang si Mateo Handig sud lamang sa usa ka hugna niadtong Marso 16 didto sa Nagoya.
- Latest
