Luyo sa nagkayong CEC Dragons

Cebu City misakmit og gold medal sa CVIRAA 3x3 basketball

CEBU, Philippines — Ang Team Cebu City, nga girepresentahan sa mga varsity players gikan sa Cebu Eastern College Dragons, milugwa nga kampiyon sa secondary boys 3x3 basketball event sa Central Visayas Regional Athletic Association (CVIRAA) Meet 2024 kagahapon sa buntag, Mayo 8, didto sa Chiang Kai-shek Gymnasium sa CEC.

Literal nga mibugwak og kayo ang Dragons gikan sa pagsugod sa duwa aron patikangkangon ang Negros Oriental, 20-9, sa ilang sangka sa finals aron pagtunol og lima ka bulawang medalya alang sa Cebu City.

Ang Cebu City 3x3 team gilangkoban nilang Andrey Roa, Lybron Lamo, Zandrie Autentico, ug Joffer Bolofer. Si Rodmark Del Rosario maoy ilang head coach inabagan nilang Dax Alicaba ug Karenrick De la Cerna, samtang si Mark Anthony Tallo ang ilang team consultant.

Tam-is ang gihimo ang pagbangon sa CEC Dragons human sila naka-bronze medal lamang sa miaging edisyon sa usa ka semanang torneyo.

Sa wala pa kini, ang Easternians mikulit og record uban ang upat ka sagunson nga korona sa CVIRAA 3x3 basketball sa wala pa miulbo ang pandemiya niadtong 2020.