Karong gabii sa Moalboal dumanjug, dalaguete mag-ilog sa korona sa Cabaron Cup Basketball

Usa ka hugtanong pinaksitay sa korte ang gipaabot nga masaksihan sa mga fans sa dihang ang Dumanjug ug Dalaguete mag-abot sa tinagakay nga duwa alang sa kampiyonato sa 2nd Mayor Inocentes Cabaron Invitational Basketball Tournament karong adlawa didto sa lungsod sa Moalboal, habagatang bahin sa Sugbo.

Magbangga ang duha ka dekalibreng puwersa sa alas 7:30 sa gabii.

Ang Dumanjug milukat og ticket sa finals human gipakagpot ang Barili, 96-67, samtang ang Dalaguete mi-abante human gitagak ang Aloguinsan, 75-65, sa semifinals sa miaging semana.

Si ex-PBA player Jojo Tangkay maoy mangu sa Dumanjug uban ang eksplosibong managsoon nga sila si Joseph Arth ug Joseph Airo Nalos. Mopalig-on kanila ang ilang import nga si Frederick Elombi.

Samtang ang Dalaguete magsandig nilang Mark Daniel Delgado, Raffy Benson, ug import nilang si Sommy Managor aron mo-abaga sa ilang opensiba.

Gawas nga mobira sa korona, ang modaog sa ilang sangka mobulsa sab og P200,000 nga ganting salapi.