Minglanilla mitikang sa finals, Carcar buhi pa sa Gullas Cup

CEBU, Philippines — Ang Abante Minglanilla mitaak sa finals samtang ang Sidlak Carcar naka-angkon pa og laing kinabuhi sa Rhea Gullas Cup 2024 First District of Cebu Inter-City/Municipality Sports Festival niadtong Sabado sa gabii, Marso 2, didto sa Minglanilla Sports Complex.

Namugnaw ang Minglanilla human sa mainit nga sinugdanan apan namaneho pagipsot ngadto sa 62-59 nga kadaogan batok sa Naga Atong Garbo sa Final Four.

Ang Minglanilla mi-ambak ngadto sa 26-16 nga bentaha apan ang ang Naga miresbak ug nalakabaw pa gani og tres puntos, 37-34, sa sayong bahin sa ikatulong kuwarter.

Human nailog og balik sa Minglanilla ang labaw, 40-39, sikit na kaayo ang kumbati sa duha ka kampo hangtud sa naghinapos nga bahin sa kulbahinam nilang aksiyon.

Sa hilimatyong segundos, si Zeke Uriah Gilbuena nakalabni og steal ug dayon milansang sa krusyal niyang itsa nga maoy nagtuldok sa kadaogan sa Minglanilla.

 Si Gilbuena mitapos uban ang 13 puntos, lima ka rebounds, usa ka assist ug tulo ka steals samtang sila si JC Rex Sanguenza ug Christian Andrew Amaba nagkumboya'g 23 puntos, 13 ka rebounds, ug unom ka assists alang sa Minglanilla, nga magpaabot pa kon kinsay ilang makaatbang sa kampiyonato.

Kini tungod kay ang Carcar nakapuwersa og tinagakay nga duwa human gibuntog ang twice-to-beat nga Talisay Askyon Agad, 83-77.

Si Jethro Sagolili maoy nangu sa Carcar bitbit ang 18 puntos, upat ka rebounds, duha ka assists ug upat ka steals samtang si Julius Tipon mirehistro sa labing unang triple-double sa torneyo uban ang 12 puntos, 12 ka rebounds, ug 10 assists nga iyang gipalamanan og lima ka steals.

Lain pang tulo ka Carcar players nga mitali og double figures sa balaseng ataki nga maoy nakapahagba sa inilog nga Talisay.

Si Patrick Simon Ulbenario miposte og double-double nga 17 puntos ug 12 ka rebounds, si Reniel Georpo midugang og 15 puntos, samtang si Adrian Cabalida midonar og 10 puntos alang sa Carcar. (BANAT NEWS)