Pelicans mituhak sa Wolves, Doncic misidlak sa Mavs

CEBU, Philippines — Si Zion Williamson mipaulbo og 36 puntos sa dihang ang New Orleans Pelicans mipahimus sa higayon nga wala ang star player sa  Minnesota nga si Anthony Edwards aron bihagon ang Timberwolves, 121-107, sa NBA kagahapon didto sa Smoothie King Center sa New Orleans, Louisiana.

Dalaygon ang gihimong pagbangon sa Pelicans human sila gilubong og 44 puntos sa Los Angeles Lakers sa miaging semana. Mikuha sab og atensiyon sila si C.J. McCollum ug Brandon Ingram nga nagkumbinar og 43 puntos alang sa Pelicans nga nagkupot na karon og 13-11 nga baraha.

Naputol ang unom ka sagunson nga daog sa Wolves apan nagpabilin gihapon sila sa kinatas-ang dapit sa liderato sa Western Conference bitbit ang 17-5 rekord.

Sa laing aksiyon, si Luka Doncic mibahug og 35 puntos, walo ka rebounds, ug unom ka assists aron pangulohan ang Dallas Mavericks ngadto sa 120-113 nga pagpayaka sa Memphis Grizzlies. Midaog ang Mavs bisan og wala ang laing tulo nila ka mga sinaligan nga sila si Kyrie Irving, Grant Williams ug Tim Hardaway Jr.

Ang rookie nga si Dereck Lively II mitampo og 16 puntos ug 16 sab ka rebounds samtang si Jaden Hardy midugang og 19 puntos alang sa Mavs.

Sa laing bahin, ang San Antonio Spurs nasugamak ngadto sa franchise-record nilang 17 ka sunod-sunod nga pilde human sila giparotan sa Houston Rockets, 93-82.

Tungod niini, ang Spurs padayong nangiwit sa West uban ang tulo pa lamang ka daog sa 22 ka duwa.

Sidto sa Atlanta, sila si Jamal Murray ug Nikola Jokic nagkumboya'g 53 puntos sa dihang gipasukarap sa defending champion Denver Nuggets anmg Hawks, 129-122.

Sa ubang mga resulta, si Joel Embiid mipabuhagay og 34 puntos sa dihang gipakaging sa Philadelphia 76ers ang Washington Wizards, 146-101, samtang si Giannis Antetokounmpo mikadlit og 32 pntos, 12 ka rebounds, ug unom ka assists sa dihang gitumba sa Milwaukee Bucks ang Chicago Bulls sud sa overtime, 133-129.