Celtics mipiog sa Sixers; Lillard mi-agak sa Bucks

Draymond Green suspendido og lima ka duwa

CEBU, Philippines —  Bisan og wala ang duha nila ka sinaligan nga sila si Kristaps Porzingis ug Jaylen Brown, nakapakita gihapon og maayong labok sa Boston Celtics hinungdan nga ilang gibihag ang Philadelphia 76ers, 117-107, aron angkonon ang unang puwesto sa Eastern Conference sa NBA kagahapon didto sa Wells Fargo Center sa Philadelphia, Pennsylvania.

Si Jayson Tatum mipabuto og 29 puntos samtang si Derrick White midugang og 27 puntos alang sa Celtics nga miinat sa ilang baraha ngadto sa 9-2. Ang Sixers natagak sa 8-3 apan ikaduha gihapon sa East.

Sa laing duwa, si Damian Lillard mitagak og 37 puntos, 13 ka assists ug upat ka assists sa dihang gibugha sa Milwaukee Bucks ang Toronto Raptors.

Wala makapakita'g aksiyon ang alas sa Bucks nga si Giannis Antetokounmpo apan way nakitang problema ang Buck kay gawas ni Lillard, misalida sab sila si Malik Beasley nga mipatuasik og 30 puntos ingon man sila si Bobby Portis ug Khris Middleton nga nagkumboya'g 29 puntos.

Ang Bucks nagbitbit na karon og 7-4 rekord.

Didto sa Washington, si Tim Hardaway Jr. mikadlit og 31 puntos ug si Luka Doncic miamot og 26 puntos sa dihang gipatikalbong sa Dallas Mavericks ang Wizards, 130-117.

Didto sa Chicago, si Paolo Banchero milansang sa iyang jump shot sa nahibilin nga usa ka segundo sa duwa aron aswaton ang Orlando Magic ngadto sa 96-94 nga daog batok sa Bulls.

Sa laing bahin, ang NBA misuspenso ni Golden State Warriors All-Star forward Draymond Green og lima ka duwa nga way bayad tungod sa pagtuok niini ni Rudy Gobert sa Minnesota Timberwolves atol sa nagkagubot nilang duwa niadtong Miyerkules didto sa Chase Center sa San Francisco.

Samtang sila si Klay Thompson sa Warriors ug Jaden McDaniels sa Wolves gipahamtangan og $25,000 nga multa tungod sa ilang papel sa nahitabong rambol nga miulbo sa unang kuwarter pa lamang sa ilang sangka.