Giannis dunay kondisyon aron magpabilin sa Bucks

CEBU, Philippines —  Si NBA superstar Giannis Antetokounmpo namahayag nga gusto niyang makakita og daghang pruweba nga ang Milwaukee Bucks magpabiling usa ka title contender sa dili pa siya mopirma og contract extension.

Ang 28-anyos nga Greek center, nga migiya sa Bucks ngadto sa labing una nilang titulo sud sa 50 ka tuig niadtong 2021, puyde nang molugway sa iyang kontrata uban sa Bucks sunod bulan apan naglatid siya og mga kondisyones sa dili pa magpahigot sa team.

"Next summer it would make more sense for both parties. Even then, I don't know," matud pa ni Antetokounmpo sigun sa taho sa New York Times.

"I would not be the best version of myself if I don't know that everybody's on the same page, everybody's going for a championship, everybody's going to sacrifice time away from their family like I do," dugang pa niya."And if I don't feel that, I'm not signing."

Apan pagdala og balik sa two-time NBA MVP krusyal kaayo alang sa Bucks aron pahayagan ang ilang tsansa nga makampiyon og usab.

Ang Bucks mikulit sa labing nindot nga 58-24 rekord sa miaging season apan gipasukarap sila sa Miami Heat sa unang hugna sa playoffs.

Niadtong 2021-22 season, ang Bucks miposte og 51-31 nga baraha apan nahagba sa mga kamot sa Boston Celtics sa Eastern Conference semifinals.

"Winning a championship comes first. I don't want to be 20 years on the same team and don't win another championship," dason pa ni Antetokounmpo. "I feel like all my teammates know and the organization knows that I want to win a championship."

"As long as we're on the same page with that and you show me and we go together to win a championship, I'm all for it," pasalig pa ni Antetokounmpo.

Human sa ilang pagkatagak sa unang hugna, gipalagpot sa Bucks ang head coach nilang si Mike Budenholzer ug gihulipan nila kini ni Toronto assistant coach Adrian Griffin.

Taas hinoon kaayo ang posibilidad nga si Antetokounmpo magpabilin sa Milwaukee human gipapirma niini og bag-ong kontrata sila si Brook Lopez ug Khris Middleton nga maoy katumpang sa gibansagang "Greek Freak" pagporma og usa ka lig-ong puwersa sa Bucks.