372 ka bata nakabenepisyo sa sports clinic sa Talisay
CEBU, Philippines — Miabot sa 372 ka mga bata ang milampos sa duha ka semana nga libreng sports clinic sa Dakbayan sa Talisay.
Si Mayor Gerald Anthony “Samsam” Gullas nihimo sa programa aron ang mga bata adunay kalingawan sa ilang bakasyon ug dili magsige og duwa sa ilang cellphone ug computer.
Matud pa ni Gullas nga sila sa siyudad ang motabang sa pagpaila sa nagkalain-laing paugnat sa kusog ngadto sa kabataan nga Talisaynon.
Sa ikaduhang hugna sa libreng sports clinic, nigradwar ang 170 ka bata sa basketball, 14 sa boxing, 45 sa badminton, 53 sa swimming, 32 sa chess, 38 sa soccer ug 20 sa table tennis.
Sa unang batch, moabot sa 600 kapin ka mga kabataan ang nakapahimulos sa sports clinic. Karong adlawa Hulyo 17 mao nasab ang ikatulo ug katapusan nga batch sa sports clinic
Sigon pa ni Gullas nga padayon ang ilang suporta sa mao nga kalihukan ug maningkamot nga palambuon pa kini.— /IBM
- Latest
