Embiid, Giannis, Doncic, Tatum gibayaw sa All-NBA First Team
CEBU, Philippines — Sila si Joel Embiid sa Philadelphia 76ers, Giannis Antetokounmpo sa Milwaukee Bucks, Luka Doncic sa Dallas Mavericks, ug Jayson Tatum sa Boston Celtics ginganlan kagahapon nga mga sakop sa All-NBA First Team.
Ilang gikauban si Shai Gilgeous-Alexander sa Oklahoma City Thunder, nga naapil sa gamhanang grupo sa unang higayon sama ni Embiid.
Tataw nga nadoble ang kalipay ni Embiid, nga bag-ohay pang gikoronahang MVP ning NBA season.
Nilang lima hinoon, si Giannis lamang ang nakakuha og perpektong 100 ka boto ug 500 puntos. Ikaduha si Tatum nga dunay 98 ka boto ug 484 puntos ug gisundan kini ni Embiid uban ang 87 ka boto ug 474 puntos.
Sa laing bahin, naglangkob sa All-NBA Second Team mao sila si Nikola Jokic sa Denver Nuggets, Stephen Curry sa Golden State Warriors, Donovan Mitchell sa Cleveland Cavaliers, Jimmy Butler sa Miami Heat, ug Jaylen Brown sa Celtics.
Nalista sa All-NBA Third Team sila si LeBron James sa LA Lakers, Julius Randle sa New York Knicks, Damian Lillard sa Portland Trail Blazers ug ang duha ka batos sa Sacramento Kings nga sila si De'Aaron Fox ug Domantas Sabonis.
- Latest
