Team Kobe, DMY Events pabiling way pilde sa Hoops Arlan Cup
CEBU, Philippines — Ang Team Kobe ug DMY Events nagpabiling way pilde sa Hoops Arlan Cup Season 1 niadtong weekend didto sa City Sports Club Cebu.
Si Ro Jocame mikadlit og 19 puntos, 11 ka rebounds ug tulo ka blocks sa dihang gibugha sa Team Kobe ang 5 Joints, 59-50, aron pahugtan ang ilang pagkupot sa liderato sa East Division bitbit ang perpektong 5-0 record.
Wala sab magpa-alkansi si Jeff Gudes nga mitagak og 22 puntos, unom ka rebounds ug tulo ka assists sa dihang ang DMY naka-eskapo sa Prayboys, 78-76, aron labnihon ang solong liderato sa West Division uban ang 4-0 nga marka.
Dali hinoon nga nakabawi ang Prayboys ug gipahimungtan niini sa ilang kayugot ang Cebuanos, 85-73.
Si Jay Palco mihipog og 20 puntos, siyam ka rebounds ug duha ka steals alang sa Prayboys, nga nagkupot na karon og 3-2 nga baraha.
Sa laing bahin, ang Wolves ug ang Gonzalodo Enterprises mipakgang sa tagsa-tagsa nila ka mga karibal aron inaton ang ilang record ngadto sa 3-1.
Si Bal Zaspa mipupo og 33 puntos ug 16 ka rebounds sa dihang gibuntog sa Wolves ang Simple Blends, 81-75, samtang si Gamaliel Bas mikolekta og 21 puntos, siyam ka rebounds ug tulo ka blocks sa 73-48 nga demolisyon sa Gonzalodo sa Pfizer.
Sa uban pang mga resulta, ang Clutch City ug Punisher miputol sa tulo nila ka sunod-sunod nga pilde.
Si Mariano Caranoo mipabuto og 24 puntos ug 27 ka rebounds sa dihang gipakaging sa Clutch City ang Broncos, 71-60, samtang si Jeremy Vidal mibahug og 21 puntos, upat ka rebounds ug tulo ka steals alang sa Punisher nga milampornas sa Cougars, 83-51.
Sa laing mga duwa, ang MEQ Builders mipaksit sa I.28 Realty 101-74, ang KJK Reino mipatigbabaw sa Letsgo!, 59-55, ug ang Dextructures mikulata sa Brothers, 95-58.
- Latest
