Durant nag-wild, gi-agak ang Nets batok Pistons

CEBU, Philippines — Si Kevin Durant mipabuto og 51 puntos uban ang siyam ka assists ug pito ka rebounds sa dihang gilabhan sa Brooklyn Nets ang nagkagidlay nga Detroit Pistons, 116-104, sa NBA kagahapon didto sa Little Caesars Arena sa Detroit, Michigan.

Matud pa ni Durant nga mikayod siya og maayo gumikan kay wala sila si James Harden ug Paul Millsap samtang ang lain nilang bitoon nga si Kyrie Irving wala pa gihapon makaduwa gumikan sa pagdumili niini pagpabakuna batok sa Covid-19.

Dako sab hinuon og natampo si Patty Mills uban ang 18 puntos ug lima ka assists ug ingon man sila si LaMarcus Aldridge ug Cam Thomas nga nagkumboya og 28 puntos alang sa Nets nga midaug katulo sa miagi nilang upat ka duwa.

Si Cade Cunningham miposte og 26 puntos, walo ka rebounds ug unom ka assists alang sa Pistons nga nangiwit karon sa Eastern Conference bitbit ang upat pa lamang ka daug ning season. Si Frank Jackson dunay 25 puntos samtang si Saben Lee mipupo og 17 puntos, unom ka rebounds ug unom ka assists sa pilderong kawsa.

Sa laing aksiyon, si Giannis Antetokounmpo mirehistro sa una niyang triple-double ning season samtang si Khris Middleton mikimada og 24 puntos aron pangulohan ang defending champion Milwaukee Bucks ngadto sa 112-97 nga demolison sa New York Knicks. Si Antetokounmpo mihipos og 20 puntos, 10 ka rebounds ug 11 ka assists.

Wala sab magpabitin si Bobby Portis nga miamot og 19 puntos ug si Rodney Hood nga mi-iskor og 14 alang sa Bucks nga wala na molingi pa sukad misutoy ngadto sa 61-48 nga labaw sa halftime.