Porter mipabuto og 50 puntos sa Rockets nga mipaulbo sa Bucks

CEBU, Philippines — Mikulit og career-high 50 puntos si Kevin Porter Jr. ug ang Houston Rockets mipakaging sa Milwaukee Bucks, 143-136 sa ilang duwa sa NBA kagahapon didto sa Toyota Center sa Houston, Texas.

Naputol sa Rockets ang lima ka sunod-sunod nilang pilde luyo sa mga paningkamot ni Porter, kinsa miiskor og 32 puntos sa second half ug 17 sa fourth period. Ang iyang miaging career best mao ang 30 puntos isip rookie uban sa Cleveland Cavaliers sa miaging season. Kadiyot ra hinuon nga nakaduwa si Giannis Antetokounmpo human makaangkon og ankle injury.

Si Antetokounmpo niduwa lang sud sa 46 segundos. Nalisa ang daan nang na-injured niyang tiil atol sa iyang paglusot diin natamakan niya ang tiil sa iyang kauban nga si Kelly Olynyk ug niligid sa kasakit. Si Antetokounmpo nagtakiang paingon sa locker room ug mipahuway sud sa pipila ka minutos sa wala pa mobalik sa bench diin nilingkod na lang siya ug wala na paduwaa pa.  Si Porter mihimo sab og 11 kas assists.

Ang Rockets nakakuha sab og igong suporta gikan ni Christian Wood nga mitimbre og 31 points ug siyam ka rebounds, samtang si  Olynyk mitampo og 24 puntos ug 13 ka rebounds.

Si Khris Middleton mibagnos og 33 puntos ug walo ka assists ug si Jrue Holiday adunay 29 puntos ug 10 ka assists sa pilderong Bucks. Si Bryn Forbes mirehistro og career-high 30 puntos gikan sa bench, apil na ang 18 puntos sa first half.  Didto sa Detroit, si Tim Hardaway Jr. mirehistro sab og career-high 42 puntos aron tabangan ang Dallas Mavericks nga modaog bisan wala si Luka Doncic sa ilang 115-105 nga kadaogan batok sa Detroit Pistons.

Si Trey Burke mitampo og 15 puntos alang sa Mavs nga nag-una na og usa ka duwa sa Portland TrailBlazers alang sa ikaunom nga dapit sa Western  Conference.

Sa Minneapolis, si Ricky Rubio mikadlit og 26 puntos, samtang ang rookie nga si Anthony Edwards mikulit og 25 puntos dihang gipukan sa Minnesota Timberwolves ang Golden State Warriors, 126-114 aron inaton ang ilang nagkadinang daog ngadto sa upat ka duwa.

Gipangulohan ni Stephen Curry ang Warriors 37 puntos, gisundan ni Andrew Wiggins nga adunay 27 puntos batok sa iyang kanhi koponan.