Hontiveros hinugot ng Phoenix
MANILA, Philippines — May bagong tungkulin si Dondon Hontiveros matapos kunin ng Phoenix Fuel Masters ang serbisyo nito para maging bahagi ng coaching staff.
Makakasama ni Hontiveros sa coaching staff si Fuel Masters head coach Topex Robinson.
Magiging assignment ni Hontiveros sa Fuel Masters ang pagiging shooting consultant.
“He’s to focus on skills development and of course, shooting,” ani team manager Paolo Bugia.
Sa katunayan, nagsimula na ang trabaho ni Hontiveros sa Fuel Masters.
Subalit naudlot ito matapos matigil ang ensayo ng lahat ng PBA teams dahil sa ipinatutupad na Enhanced Community Quarantine ng Inter-Agency Task Force sa NCR plus bubble.
“He was not able to stay for a long period, but nakapag-practice na siya,” dagdag ni Bugia.
Ilang players ang tinututukan ni Hontiveros kabilang na sina Matthew Wright at Chris Banchero para mas lalo pang mahasa ang kanilang shooting skills.
“If may opportunity, maybe after this ECQ. Next cycle kung makapag-test siya and he comes back, maybe sa kabilang grupo naman siya puwedeng iikot,” dagdag ni Bugia.
Sa ngayon, kuntento muna ang Fuel Masters coaching staff sa zoom meeting at pansariling workouts sa kani-kanyang mga tahanan.
Sa oras na maalis na ang ECQ, umaasa ang buong Phoenix squad na magpapatuloy na ang ensayo ng mga koponan para paghandaan ang PBA Season 46 Philippine Cup.
- Latest
