Ex-ALA boxers Jerusalem, Santisima napunta sa Sanman

CEBU, Philippines — Duha ka bulan sukad sila madislokar human sa makapakurat nga pagpanirado sa ALA Gym tungod sa pandemiya, sila si Melvin "El Gringo" Jerusalem ug Jio "Santino" Santisima nakakaplag og bag-ong panimalay sa Sanman Promotions nga tua magbasi sa General Santos City.

Sila maoy ikaduhang batch sa ALA boxers nga moabli og laing panid sa ilang karera uban sa bag-ong promoter ug manedyer sunod nilang four-division world champion Donnie "Ahas" Nietes ug "Prince" Albert Pagara nga parehong nagpahigot sa MTK Global.

Si Sanman CEO Jim Claude "JC" Manangquil mipahibawo nga sila si Jerusalem ug Santisima bag-o lang nakapirma og kontrata uban kanila. Ang 26-anyos nga si Jerusalem nga  mao karon ang WBC No.1 minimumweight contender ug ang 24-anyos nga si Santisima, kanhi WBO Oriental super bantamweight champion nangapilde sa miagi nilang mga away alang kalibotanong titulo.