Aguilar, wong gipamulta'g P20t
CEBU, Philippines — Gipamulta sa PBA og P20,000 matag usa sila si Japeth Aguilar sa Barangay Ginebra ug Adrian Wong sa Rain or Shine gumikan sa ilang partisipasyon sa training/ scrimmage sessions atol sa kwarantin nga dili otorisado sa liga.
Gipakanaog ni PBA commissioner Willie Marcial ang maong silot human gipatawag ang duha ka players sa iyang buhatan niadtong Lunes. Gawas sa multa, gimandoan sab ni Marcial sila si Aguilar ug Wong nga mopaubos sa swab-test duha ka higayon sud sa 14 ka adlaw nilang pagkwarantin sa ilang balay.
“Nag-sorry naman sila at pinagsabihan ko," matud pa ni Marcial segun sa taho sa The Philippine STAR.
Human sa ilang kwarantin, duna pa'y laing tahas nga pagabuhaton sila si Aguilar ug Wong. Kini mao ang pagpahigayon og 30 ka oras nga community service nga apil sa ilang silot.
Gumikan sa pipila ka photo ug video posts sa social media, sila si Aguilar ug Wong nasakpan nga mihimo og group workout ug ingon man miduwa og pick-up game niadtong naghinapos nga bahin sa Hunyo ug sayo ning bulana.
Kauban sa ilang grupo mao si Isaac Go nga gikuha sa Columbian Dyip niadtong 2019 PBA Draft, apan kasamtangang gipahuwam sa Gilas Pilipinas pool alang sa 2023 FIBA World Cup.
Si Marcial nagkanayon nga naka-estorya na niya si Go ug iya kining gitambagan nga sa kanunay mosunod sa mga patakaran sa kagamhanan alang sa panglawas ug kaluwasan taliwala ning pandemiya.
- Latest
