Alex Len ikatulong player sa kings nga nagpositibo sa virus

CEBU, Philippines — Lain na sab nga NBA player ang nagpositibo sa Covid-19 samtang ang planong pagsugod og balik sa liga karong Hulyo 31 nagkaduol.

Si Sacramento Kings big man Alex Len maoy ikatulong player sa maong prangkisa nga nataptan sa bagsik nga coronavirus. Ang laing duha mao sila si Buddy Hield ug Jabari Parker.

Ang Kings, usa sa mga teams nga gipaabot nga mopakita'g aksiyon sa pagtiwas sa 2019-2020 NBA season sunod bulan didto sa Disney World sports complex sa Orlando, Florida.

Si Parker daan nang mipahibalo nga bisan pa sa nahitabo kaniya, gusto pa gihapon niyang moduwa sa nahibiling bahin sa season Gawas sa Kings, dunay pa'y dili momrnos pito ka mga players gikan sa tulo ka teams ang nagpositibo sa coronavirus ning miaging pipila ka adlaw, apil na si Denver Nuggets All-Star center Nikola Jokic.

Gumikan ning nagkadaghan nga positibong kaso sa Covid-19 sa NBA, nagsugod na og ulbo ang kabalaka ug misamot og kainit ang isyu sa kaluwasan ug panglawas kabahin sa planong pagbalik sa aksiyon sa liga.

Gani pipila na ka mga players ang mipadayag nga dili na sila gusto pang motiwas sa season, apil na niini sila si Kyrie Irving sa Brooklyn Nets, Dwight Howard ug Avery Bradley sa Los Angeles Lakers ug si Willie Cauley-Stein sa Dallas Mavericks.