Pagtiwas sa nba gihisgutan na

CEBU, Philippines — Gikompirmar sa NBA kagahapon nga ila nang gihisgutan uban sa The Walt Disney Co. ang posibleng pagbalik sa aksiyon sa liga karong Hulyo sa mga resorts niini didto sa Orlando, Florida.

Mismo ang tigpamaba sa liga nga si Mike Bass maoy mipahibalo niining kalamboan nga giatngan sa mga sakop sa NBA.

Giklaro hinuon ni Bass nga kon ugaling mopakanaog og desisyon ang NBA, hatagan niini og labing bug-at nga prayoridad ang panglawas ug kaluwasan sa tanang mga hintungdan.

Tungod niini, ang NBA hugot kaayong nakigkoordinasyon sa mga batid sa panglawas ug ingon man sa mga tinugyanan sa kagamhanan.

Niadtong Marso 11, gisuspenso sa NBA ang kasamtangan niining season gumikan sa coronavirus pandemic.

Gitaho sa ESPN nga ang NBA Board of Governors magtigum karong Biyernes aron tukion ang mga mosunod niining lakang.

Apil na niini ang paghatag og dugang detalye alang sa mga players ug coaches kabahin sa plano nga tiwason ang naputol nga season.

Lakip sab sa mga pagahisgutan ang format sa pagpadayon sa liga kon tiwason pa ba ang nahibiling mga duwa sa regular season o molahos na lang sa playoffs. Gawas sa Disney resorts didto sa Orlando, gisaytan sab nga binyu sa NBA ang Las Vegas.