Phoenix miangkon og luna sa Governors' Cup playoffs

CEBU, Philippines —  Ang Phoenix Super LPG Fuel Masters mipiog sa Meralco Bolts, 105-101, aron pag-angkon og luna sa PBA Season 50 Governors' Cup playoffs niadtong Biyernes didto sa Ynares Center Antipolo.

Alkansi og 10 puntos sa first half, ang Fuel Masters miwani sa Bolts sa ikatulong kuwarter, 32-24, ug dayon nakasustinir sa nindot nilang salida sa nahibiling bahin sa duwa aron paglakaw ngadto sa kuwatro puntos nga kadaogan.

Uban ang 5-3 win-loss rekord, ang Phoenix garantisado na og luna sa crossover quarterfinals sa Group B kauban ang Magnolia Hotshots.

Ang nahibiling duha ka luna ilogan sa Rain or Shine (4-3), Meralco (4-6), Ginebra (3-5) ug Blackwater (3-5). Si Ricci Rivero maoy nangu sa Fuel Masters uban ang 26 puntos, siyam ka rebounds pito ka assists, tulo ka steals ug duha ka blocks.

Ang import nilang si Marcellus Earlington mibubo og 14 sa iyang 20 puntos sa second half nga iyang gisukipan og 14 ka rebounds ug lima ka assists.

Balanse kaayo ang ataki sa Phoenix diin si Kai Ballungay mi-iskor og 17, si Ken Tuffin mitali og 16, samtang sila si Gian Mamuyac ug Tyler Tio nagkumboya'g 23 puntos.

Si Jordon Varnado mibubo og 36 puntos alang sa Meralco, nga mitapos sa ilang kampanya sa eliminasyon bitbit og 4-6 nga baraha.

Sa laing bahin, nanghugyaw sila si Cameron Clark ug Juan Gomez de Liano sa dihang gimasaker sa Converge FiberXers ang Macau Giant Pandas, 162-108.

Si Clark mipabuto og 32 puntos sud lamang sa tulo ka kuwarter, samtang si Gomez de Liano mihimo og kasaysayan isip labing unang rookie nga mikadlit og duha ka sagunson nga triple-doubles.

Si Gomez de Liano mipupo og 13 puntos, 11 ka rebounds ug 12 ka assists sa dihang ang FiberXers miposte sa ikaupat nilang sunod-sunod nga daog aron inaton ang ilang rekord ngadto sa 7-4 sa Group A.