Lemanis bukas sa posibilidad na maging Gilas coach

MANILA, Philippines — Bukas ang pintuan ni dating Australian men’s national basketball team head coach Andrej Lemanis sa posibilidad na hawakan ang training program ng Gilas Pilipinas.

Bilib si Lemanis sa abilidad ng Pinoy cagers partikular na sa tuwing dala-dala ng mga ito ang bandila ng Pilipinas sa mga international tournaments.

“I thought they were really skilled as well. What immediately stood out was the energy with which they played, how hard they played, and the passion which they played, which I really liked. I really liked those aspects and those attributes,” ani Lemanis.

Isa pa sa kinagigiliwan ni Lemanis sa Pilipinas ay ang pagmamahal ng mga Pinoy fans sa basketball.

Alam ni Lemanis kung gaano kalaki ang basketball sa Pilipinas kaya’t ito ang isa sa mga nais maranasan ng Australian coach sakaling mahawakan nito ang Gilas Pilipinas.

“It’s just awesome to be involved in an environment like that and to see how much it means to everyone in the Philippines, and I think that translates in the national team,” ani Lemanis.

Naniniwala si Lemanis sa abilidad ng Pinoy cagers na kayang makipagsabayan sa mga world-class players.

Para kay Lemanis, puso at dedikasyon kasabay ng magandang training at preparasyon ang susi upang maabot ang inaasam na tagumpay.

Kailangan din aniyang madetermina ang kakayahan ng bawat manlalaro upang maipuwesto ito sa kanyang tamang posisyon.

“The skill of the coach is to ensure that the players are playing in the positions or running the variations that most suit the guys that you have,” ani Lemanis.

Sa kasalukuyan, itinalaga ng Samahang Basketbol ng Pilipinas (SBP) si Mark Dickel bilang interim head coach ng Gilas Pilipinas.

Wala pang anunsiyo ang SBP kung si Dickel na ang magiging opisyal na head coach ng Gilas Pilipinas.

Beterano na rin si Dickel sa coaching. Naging bahagi ito ng New Zealand national team na sumabak sa 2000 Sydney at 2004 A­thens Olympics habang hinawakan nito ang Albanian national basketball team mula 2010 hanggang 2011.

Sa kabilang banda, si Lemanis ang humawak sa Australian national team mula 2013 hanggang 2019.