Mayweather nag-sparring, gisaway

CEBU, Philippines — Gisugnoran og balik ni Floyd Mayweather Jr. ang mga hugon-hugon nga mobalik siya og away dihang mitikang siya sud sa iyang gym didto sa Las Vegas aron mag-sparring niadtong weekend.

Mao kini ang gibalita sa The Sun basi sa video nga gipaambit ni kanhi super lightweight champion Ashley Theopane sa iyang Twitter.

Sa maong video, makita ang usa ka tawo nga nagsul-ot og mask, apan walay gloves samtang nagbutang og Vaseline lotion sa nawong ni Mayweather sa wala pa kini mag-sparring.

Duna sa'y usa ka tawo nga wala sab mag-mask nga mi-check sa gloves ni Mayweather sa wala pa kini misaka sa ring.

Gikalipay sa mga fans sa 43-anyos nga si Mayweather nga mibalik na sa aksiyon ang ilang idolo.

Apan dunay daghang wala mahimuot sa gibuhat ni Mayweather. Ilang gisaway ang wa'y pildeng kampiyon ug mga kaubanan niini gumikan sa wala nila pagtuman sa mga lagda sa social distancing taliwala ning coronavirus pandemic.