Water market 4-0 na sa Power Forty Sinulog Cup
CEBU, Philippines — Nanginhas na sab og daog ang Water Market aron magpabiling lider sa Power Forty Basketball Tournament 50-above Sinulog Cup.
Ang Water Market midaog batok sa Nacario Massage Parlor, 62-58 alang sa ilang 4-0 win-loss record niadtong Martes diha sa Inayawan Sports Complex.
Si Atan Diaz mikandos og 18 puntos, samtang si Bodak Tantiado mihakot og 17 puntos sa Water Market nga nibangon gikan sa 18-36 nga pagkalubong sa halftime.
Misag-ob sab og 10 puntos si Dome Ozon sa Water Market ni playing team owner Vez Eleguin.
Upat unta ka players ang miiskor og double digits sa Nacario Massage Parlor, apan wala makalahutay kusog nila nga maoy nakaingon sa ilang kapildihan.
Ang Nacario Massage Parlor nga wala pa'y daog sa upat ka duwa gipangulohan ni Danny Dela Peña nga mikabkab og 17 puntos, gisundan ni Boy Cantarona sa iyang 16 puntos, samtang sila si Manny Pacquiao ug Boy Zerna nagtampohay og 10 puntos sa team ni Edgar Nacario.
Sa laing aksiyon, ang Sandal Broker milubong sa Bob 'N Chino, 77-51 alang sa ilang 2-1 nga baraha.
Gipangulohan ni Boy Allerta ang Sandal Broker nga mipugnit og 24 puntos. Ang Sandal Broker ni Alex Sandal nga maoy nidominar sa duwa nakakuha sab og igong suporta gikan ni Alex Cabreros nga mipabuto og 22 puntos, ingon man ni Welbor Cabrera nga mikadlit og 18 puntos.
Tulo sab ka players sa Bob 'N Chino ang mirehistro og double digits pinangulohan ni Jun Abapo sa iyang 17 puntos.
Sila si Dome Labalan ug Alex Ocariza mitampo'g 12 ug 10 puntos sa team nilang Bob Samson ug Chino Kalinga nga nagbitbit na karon og 1-3 nga baraha ning maong liga nga nahimo pinaagi sa paningkamot ni CESAFI head referee ug Power Forty Ballclub president Edwin Dejacto Sr., inabagan sa tanang miyembro sa maong organisasyon.
PUNTOS MATAG USA
Unang duwa:
WATER MARKET (62) – Diaz 18, Tantiado 17, Ozon 10, Fuentes 9, Eleguin 2, Magallon 2, Yosores 2, Dayota 2.
NACARIO (58) – Dela Peña 19, Cantarona 16, Pacquiao 10, Zerna 10, Peligro 2, Alcordo 2.
Ikaduhang duwa:
SANDAL (77) – Allerta 24, Cabreros 22, Cabrera 18, Capala 3, Echavez 2, Sandal 2.
BOB 'N CHINO (51) – Abapo 17, Labalan 12, Ocariza 10, Ocampo 8, Cabatas 2, Mabatuan 2.
- Latest
