Game 1 sa Western Conference finals

CEBU, Philippines – Nagtige sila sa 3-point contest atol sa NBA All-Star weekend niadtong Pebrero.

Tulo ka bulan ang milabay, mag-engkuwentro na sab ang managsuong Stephen Curry sa Golden State Warriors ug Seth Curry sa Portland Trail Blazers, ning higayona alang sa mas dako ug mag bug-at nga dungog.

Ang panagkaribal sa managsuong Curry tataw nga modugang og lamas sa best-of-seven NBA Western Conference finals tali sa Warriors ug Trail Blazers nga sugdan  karong alas-9 sa buntag didto sa Oracle Arena sa Oakland, California.

Segun sa Elias Sports Bureau, mao kini ang labing unang higayon nga ang duha ka managsuon mag-abot sa conference finals ug labing unang higayon sab  nga ang duha ka managsuon magkumbati sa playoffs sukad nilang Marc Gasol sa Memphis Grizzlies ug Pau Gasol sa San Antonio Spurs niadtong 2017.

Sama sab unta ang rekord nga makab-ot sa mga Gasol ugaling lang kay si Pau na-injured ug dili makaduwa uban sa Milwaukee Bucks batok sa Toronto Raptors diin kasamtangang sakop si Marc sa Eastern Conference Finals nga mosikad ugmang adlawa.

Ang 31-anyos nga si Stephen Curry mopakitag aksiyon sa ikalima niyang sagunson nga conference final samtang si Seth naglaraw sa motaak sa NBA Finals sa labing unang higayon.

Matud pa ni Seth nga sa miaging mga season igo lamang siya magtan-aw ug moabiba sa iyang maguwang sa West finals mao nang gibati siya karon og tumang kahinam dili lamang kay makontra niya ang igsuon, apan gumikan sab kay pareho man nilang damgo ang maka-abot sa finals.

"So many years I've watched Steph play in the Western Conference final, the NBA finals -- being in the crowd," sumala pa sa 28-anyos nga si Seth. "It's going to be fun to be out there on the court, competing to get to the finals. It's a dream come true for us two."

Samtang ang mga gininakanan nilang Steph ug Seth nga sila si Dell ug Sonya Curry gibati na og tumang kalipay karon pa lang daan kay bisan og unsay resulta sa serye pareho man silang daogan.

"From our end, to see both of our sons to compete at this level and for the goal to be a championship is such a blessing. We never could imagine this,"  matud pa ni Sonya Curry."One of them might go home, but we're going to the championship."