E&F Surplus klaro na masulod sa top 2
CEBU, Philippines — Hayag pa sa udtong tutok ang kahigayonan sa E&F Surplus nga masulod sa Top 2 dihang midaog sab kini, ning higayona batok sa Chichay's Chicharon, 67-60 sa CLBA Season 2 basketball tournament niadtong Sabado didto sa GT Academy gym sa Tayud, Lilo-an.
Lima lang ka players sa E&F Surplus ang nakaiskor, apan upat kanila ang miiskor og double figures ubos sa pagpangulo ni Kenn Nuñez nga mikadlit og 22 puntos.
Gisundan kini sa team owner nga si Fury 'Triggerman' Trazona mipaksit og 16 puntos, silang Arprel Sabang ug Tata Betinol nagkumbinar og 25 puntos sa E&F Surplus nga naglisud sa nag-unang duha ka kuwarter resulta nga nabiyaan sila sa halftime, 22-30 ug didto na sila nakagukod sa fourth period.
Ang E&F Surplus nagtangag na karon og 8-1 nga baraha.
Si Bebe Armian mao sab ang nangu sa Chichay's Chicharon nga miugkat og 13 puntos. Si Walter Baring miamot og 12 puntos, samtang si Arnel 'Cdu' Pepito mitikdol og 11 puntos sa team nilang Wendy Quiapo ug Jun Rayan Pepito.
Sa laing duwa, ang 4Nichole's Farm miani na sab og daog human nakaipsot sa Philcement, 70-67.
Gipangulohan ni Niño Icot 4Nichole's Farm nga mipupo og 15 puntos.
Gumikan sa maong daog, ang 4Nichole's Farm nakigsawo na sa ikaduhang dapit sa standing uban sa biktima nilang Philcement, Chichay's Chicharon, Kalubi-an ug Jonghap sa managsama nilang baraha nga 6-3.
Nangulo sa Philcement ni Bobong Tiongson mao si Louise Pepito nga miugkat og 23 puntos, si Lito Dejarme miabuno og 16 puntos ug si Randy Mantos mikabkab og 10 puntos.
Ang liga nga nahimo pinaagi sa mga paningkamot nilang Arnold Labustro ug Henry Agbon, gipaluyohan sa Union Galvasteel ug J&J Surplus.
Ang mga duwa gipadagan ni league commissioner Fury Trazona sa abag ni Eric Montebon.
PUNTOS MATAG USA
Unang duwa:
E&F Surplus (67) – Nuñez 22, Trazona 16, A. Sabang 14, Betinol 11, Ursal 4.
CHICHAY's (60) – Armian 13, Baring 12, Cdu Pepito 11, Pepito 9, Rojo 4, Sayta 4, Cortes 2, Arocha 2, Caparoso 2.
Ikaduhang duwa:
4NICHOLE's Farm (70) - Icot 15, Auman 9, Lascuna 9, Owatan 9, Cañete 4, Roland 3, Hernando 2.
PHILCEMENT (67) – Pepito 23, Dejarme 16, Mantos 10, Gaite 9, Gestopa 5, Mananquil 2.
- Latest
