Alab andam na sa playoffs

CEBU, Philippines – Sugdan na sa Alab Pilipinas ang lisud nilang misyon nga mapanalipdan ilang titulo sa ASEAN Basketball League karong gabii batok Hong Kong Eastern Lions didto sa Hoopsdome sa Barangay Gun-ob, Lapu-Lapu City.

Kini ang ikatulong higayun nga moduwa ang Alab sa Hoopsdome, apan mas mahinungdanon karon tungod kay ang sangka batok Lions maoy Game 1 sa ilang best-of-three quarterfinals series. Ang Alab mitapos sa elimination sa No.2 human sa sunod-sunod nilang pilde, apan si coach Jimmy Alapag pabiling positibo sa ilang tsansa nga makahimo og back-to-back championship. Dili hinuon kompiyansaan ang No.7 seed nga Eastern Lions.

Nindot hinuon nga balita ang gihatud ni Alapag tungod kay gikompirmar niya nga mubalik na og duwa karon ang star import nga si Renaldo Balkman uban sila si Brandon Rosser ug Cebuano Cael Tiongson kinsa pulos nakarekober na sa injuries.

Gawas sa tulo, anaa usab ang higanteng si PJ Ramos kinsa usa sa mga leading scorer ug rebounder sa koponan uban ang Fil-Americans nga sila si Ethan Alvano ug Ray Parks Jr.

Masuwayan hinuon sila sa tulo ka import sa Eastern Lions nga sila si Marcus Elliot, ODarien Bassett ug 7-footer nga si Samuel Deguara.

Krusyal ang daog karon sa Alab tungod kay ang Game 2 adto ipahigayun sa Hong Kong sa Abril 3. Kung moabot og Game 3, ang do-or-die game mahitabo didto sa FilOil Arena sa San Juan.  Ang mudaog tali sa duha maoy makigbangga sa mudaog tali sa Singapore ug Macau.