Carcar mipakgang sa Talisay sa Governor's Cup

CEBU, Philippines – Giputol sa Carcar City Lechoneros ang nagkadinang 17 ka daog sa Talisay City human ilang gipayaka ang defending champion Aquastars, 85-84 sa kulbahinam nilang sangka sa 1st District cluster sa 2019 Cebu Governor's Cup Inter-Cities and Municipalities Under 21 Developmental Basketball Tournament niadtong Domingo sa gabii didto sa Minglanilla Sports Complex.

Gibira ang kampiyonato sa miaging season bitbit ang 14-0 record, giablihan sa Aquastars ang pagdepensa sa ilang trono pinaagi sa pagkulit og tulo ka sagunson nga daog, apan ning higayona nalapa sila sa mga kamot sa Lechoneros.

Si Ronald Delfino mitagak og 12 sa iyang game-high 28 puntos sa katapusang kuwarter sa dihang ang Carcar miposte sa ikatulo nilang daog sud sa lima ka duwa. Si Delfino nakaangkon og igong suporta gikan nilang Rey Joseph Alfeche, Dilcer Gaviola ug Dave Abella nga nagkumboya og 35 puntos.

Kanunay nga naglabaw ang Lechoneros sukad mirehistro og 26-14 nga bentaha ug dayon gisanta ang init nga resbak sa Aquastars sa endgame aron pag-ipsot niini ngadto sa ligas kaayong nga kadaogan.

Si Keaton Clyde Taburnal dunay 23 puntos, si Clark Ruedas mitapos uban ang 18 puntos ug si Jay Deiparine milansang og 17 puntos sa pilderong Talisay.

Sa laing aksiyon sa 1st District, si Alvier Alforque mipabuto og 22 puntos sa dihang gipaluhod sa Minglanilla Archangels ang Naga City Electrifiers, 93-82. 

Ang Minglanilla nga nakakubit sab og tinigum nga 25 puntos gikan nilang Ryzel Gilbuena ug Mark Nebril, nagtangag na karon og 2-2 record, samtang ang Naga natagak ngadto sa 3-2.

Sa aksiyon sa 4th District didto sa Santa Fe Sports Complex sa isla sa Bantayan, ang Madridejos milubong sa Santa Fe, 110-61 aron pagpaduol niini ngadto sa quarterfinals uban ang 4-0 nga baraha, ang Tabuelan mipilde sa Medellin, 84-81 aron tablahon ang ilang rekord ngadto sa 2-2, samtang ang Bogo City mipatikangkang sa Tabogon, 68-60  alang sa ikatulo nilang daog batok sa usa  ka pilde.