1st APN 3on3 chess mosikad

CEBU, Philippines – Ang labing unang Asia Pacific Network (APN) Enterprise 3on3 Open Chess Tournament mosikad na pinaagi sa unang hugna sa eliminasyon niini karong weekend diha sa Ayala Chess Club nga nahimutang sa lower ground floor duol sa Under Armour. Matud pa ni event organizer Eduard de la Torre sa Cebu International Chess Society nga ang unang qualifying stage karong adlawa abli niadtong mga nag-edad og 18 anyos paubos.

Samtang ang ikaduha ngadto sa ikaunom nga elimination round nga mahuman karong Disiyembre 8-9 abli sa tanan nga mga interesadong magduduwa og ahedres. Ang top 2 qualifiers matag eliminasyon mo-abante ngadto sa semifinals karong Disiyembre 15 ug dayon ang top 3 sa matag semis round motikang sa finals karong Disiyembre 16.

Gawas sa tropeyo, ang makampiyon ning usa ka bulan nga torneyo nga gipaluyohan sab sa PLDT, Radius Telecom ug CyberPower mobulsa og P15,000. Ang mopahiluna sa ikaduhang dapit mokubra og P10,000, samtang ang malandig gikan sa ikatulo ngadto sa ikalimang puwesto modawat og P5,000, P4,000, ug P3,000.

Kadtong top board players dunay P1,000 nga bonus matag usa. Ang rehistrasyon nagkantidad og P700 sa 18-under ug P1,000 sa open.

Alang sa dugang detalye, mahimong mokontak ni De la Torre (0908-1635144) o e-mail sa [email protected].