J.R. Smith gustong magpa-trade gikan sa Cavs

CEBU, Philippines — Ang guwardiya sa Cleveland Cavaliers nga si J.R. Smith  mipadayag sa iyang tinguha nga magpa-trade gikan sa   maong team nga daw sa wala na'y interes sa iyang serbisyo.

Gumikan sa iyang pag-angkon, lagmit mapahamtangan og multa si  Smith sa NBA.

Midugang si Smith nga nasayod hinuon ang Cavs sa iyang tinguha nga magpabalhin og laing koponan nga interesado mokuha kaniya.

"Yeah, they know," matud pa ni Smith. "They don't want me here, so they obviously know."

Segun sa NBA collective bargaining agreement, ang mga players gidid-an nga mopublikar sa ilang hangyo nga magpa-trade ug gitaho sa ESPN nga gisusi na sa liga ang mga komento ni Smith.

Sa miaging tuig, si kanhi Phoenix Suns guard Eric Bledsoe gipamulta og $10,000 gumikan sa iyang tweet nga "I don't wanna be here".

Si Smith nga kaupat lamang makaduwa sa pito nila ka duwa karon nga season, wala na kaayo gamita sa Cavs ug mikunhod pa gani ang iyang playing time.

Nagkanayon si Smith nga walay problema alang kaniya kun ugaling dili na siya paduwaon pa kay ang gusto niyang mahitabo mao nga tarungon lang unta siya og sulti sa Cavs nga wala na kini gusto kaniya.