Ironman 70.3 Asia-Pacific BAG-ong kampiyon gikoronahan

CEBU, Philippines — Adunay bag-ong hari ug reyna sa Ironman 70.3 Asia Pacific human sila si Mauricio Mendez sa Mexico ug Radka Kahlefeldt sa Czech Republic migawas nga labing paspas sa tagsa-tagsa nila ka dibisyon kagahapon didto sa Shangri-La's Mactan Resort and Spa didto sa Lapu-Lapu City.

Si Mendez misakmit sa men's elite title sa oras nga 3:46:45 gisundan ni Tyler Butterfield (3:47.39) ug Braden Currie (3:48.12) sa ikaduha ug ikatulong dapit. Pakyas ang Australiano nga si Tim Reed sa pagdepensa sa iyang korona dihang igo lang siya milandig sa fourth place sa oras nga 3:52:51.

Sa iyang bahin, si Kahlefeldt, naglawig sa oras nga 4:12:13 diin gilupig niya ang mga veterans nga sila si Caroline Steffen ug Mel Hauschildt. Si Steffen ug Hauschildt maoy second ug third placers sa oras nga 4:21:50 ug 4:22:50.

Sa Asian Elite division, ang Cebu-based nga si Banjo Norte miangkon sa men's title sa oras nga 4:24:34, samtang si Alexandra Ganzon midaog sa women's class sa oras nga 5:04:52.

Mga Cebuanos nga misidlak naglakip ni Paul Jake Castillo kinsa maoy midaog sa CEO division batok nila ni Tyrone Tan ug Gregie Pamakid, samtang sila si Rue Reinhardt Panibon ug Karl Greyson Lee kampiyon sa 18-24 class.

Ang Team Spectrum mao usab ang miangkon sa all-men ug mixed relay championships, samtang ang Santa Barley-Cebu ang midaog sa all-women's. (BANAT NEWS)