Talisay, Liloan, Sibonga, Compostela 2-0 na sa Governor’s Cup

CEBU, Philippines — Ang Talisay City, Liloan, Sibonga ug Compostela miposte sa ikaduha nilang sagunson nga daog sa 2026 Governor’s Cup Under-18 Basketball Tournament niadtong weekend. Si Zaijan Cabanes mi-iskor og 19 puntos samtang si Red Vincent Mabala midugang og 14 puntos sa dihang gitumba sa Talisay ang Carcar City, 87-76.

Mihimo og kasikas si Jhon Carl Arcelo uban ang 15 puntos samtang sila si Lanz Benedict Ramos, Shawn Harvey Ayuda and Joshua Pilapil miamot og 10 puntos matag usa sa dihang gipiog sa Liloan ang Tuburan, 65-56.

Si Chresler John Medina mipabuto og 21 puntos ug si Carl Abella mibirada og 15 puntos aron pangulohan ang Sibonga ngadto sa 69-48 nga paglampaso sa Oslob, samtang si Khient Patrick Gamao mikulit og double-double nga 19 puntos ug 14 ka rebounds aron ibandera ang Compostela ngadto sa 63-51 nga pagpakaging sa Carmen. Sa laing bahin, ang Mandaue miinat sa ilang rekord ngadto sa 2-1 human gilampornas ang Balamban, 106-41. Si Khlint VJ Rosal ang nangu sa Mandaue bitbit ang 14 puntos, samtang sila si Edrian Demape ug Luke Brent Dy parehong midonar og 13 puntos.

Ang Argao, Aloguinsan ug Barili milansang sab og impresibong kadaogan batok sa tagsa-tagsa nila ka mga kaatbang.

Si Lawrence Brillantes mipupo og 19 puntos, pito ka rebounds, unom ka assists ug upat ka steals sa dihang gibugha sa Argao ang Malabuyoc, 72-52.

Mibubo si Klient Patonongon og 23 puntos, unom ka rebounds, upat ka steals, duha ka blocks ug usa ka assist aron ituboy ang Aloguinsan ngadto sa 100-51 nga demolisyon sa Santander.

Sila si Josienio Presbitero, Sieth Michael Puerto ug Kris Angelo Basalo mikadlit og managsamang 11 puntos sa dihang gidominar sa Barili ang Ronda, 92-76. Sa ubang mga duwa, ang Tabuelan mipaksit sa Bogo City, 65-53, samtang ang Pinamungajan nakalingkawas sa Dalaguete, 66-64.

Si Diorel Cuer ang bida sa Tabuelan uban ang 20 puntos, pito ka rebounds ug pito ka assists, samntang si Terdy Cajeras mikimada og 17 puntos, upat ka rebounds ug tulo ka steals. Mikuha og atensiyon sa Pinamungajan si Yakovic James Siarot uban ang 15 puntos, unom ka rebounds, tulo ka assists ug duha ka steals. Gisuportaan siya nilang Nael Vench Bayhante ug John Dave Yanong nga mirehistro og 13 puntos matag usa.