Cool Smashers, Flying Titans gisubhan og kadaogan sa PVL
CEBU, Philippines — Managlahi nga dalan ang ilang giagian apan parehong nagmadaogon ang Creamline Cool Smashers ug Choco Mucho Flying Titans sa pasiunang mga duwa sa Premier Volleyball League (PVL) Season 10 nga gisaksihan og rekord nga 19,106 ka fans diha sa SM Seaside Cebu Arena niadtong Sabado, Oktubre 10.
Gigatongan sa 18 puntos gikan ni Jema Galanza ug sa beteranong liderato sa team captain nilang si Alyssa Valdez, ang Cool Smashers misikad sa ilang kampanya nga makasagunson og korona sa 2026 PVL All-Filipino Conference Siklab Series uban ang sagunson nga sets nga kadaogan batok sa Akagi Charges, 25-18, 25-21, 25-18. “Sobrang sarap sa pakiramdam na lahat kami nag-contribute. This is what we train for, at sana magtuloy-tuloy ito,” matud pa ni Galanza. Sa sayo pa, si Eya Laure mipabuto og 22 puntos sa dihang ang Choco Mucho impresibong mibangon human naghagba sa nag-unang duha ka sets aron pagtikalbongon ang Capital1 Solar Spikers sa lima ka kulbahinam nga sets.
Ang Solar Spikers mipatigbabaw sa nag-unang duha ka sets, 25-22, 25-18.
Apan ang Flying Titans madasigong miresbak sa sunod nga duha ka two sets, 25-17, 25-20, aron pagpwersa og deciding fifth set.
Gipalig-on sa upat ka Sugbuanong mga bitoon nga sila si Sisi Rondina, Deanna Wong, Isa Molde ug Lorene Toring, ang Flying Titans mikumpleto sa dalaygon nilang pagbalitok pinaagi sa pagdominar sa katapusang set, 15-8.
“We worked really hard for this win, and we knew we had to earn it,” dason pa ni Laure. “We kept reminding one another that we had each other’s backs. No matter what happened, we had to keep fighting and trust the process.”
Sa laing bahin, ang Alpha Insurance Protectors nalihian sab og daog sa Spikers’ Turf Season 10 human sila nakaipsot sa Savouge Spin Doctors sa makapaisa'g balahibo nga lima ka sets nilang sangka, 25-22, 19-25, 26-24, 22-25, 16-14.
- Latest
