Standhardinger gidungog nga i-trade sa San Miguel
CEBU, Philippines – Adunay mga pagduda nga ang San Miguel Beermen mo-trade sa ilang No.1 pick ug Fil-German nga si Christian Standhardinger.
Si Standhardinger nga naglisud sa lab-as niyang tuig sa PBA tungod sa injury, wala pa kapakita og nindot nga duwa uban sa Beermen ug adunay hugon-hugon nga i-trade siya.
Una nang gikataho nga ang Beermen mohatag ni Standhardinger ngadto sa igsuong koponan nga Magnolia Hotshots. Aduna sa'y laing trade report nga posibleng ilabay sa Beermen ang 6-foot-8 forward ngadto sa Alaska Aces bugti ni Calvin Abueva.
Dali hinuon nga gitubag ni Standhardinger ang nanggawas nga taho diin igo ra siya nga miingon nga wala siya mabalaka ug salig siya sa iyang koponan.
"I am not worried," matud pa ni Standhardinger sa Spin.ph. "I think that San Miguel organization is professional so far, and they are all professional. So I’m pretty sure that I will be the first one to know that I’ll get traded or not."
Sa pagkakaron, padayon pa nagpaalim si Standhardinger sa iyang injury sa tuhod ug mipasalig siya nga makaduwa na atol sa playoffs sa PBA Commissioner's Cup.
- Latest
