Gay, Crawford mag-free agent

CEBU, Philippines – Sila si Rudy Gay sa San Antonio Spurs ug Jamal Crawford sa Minnesota Timberwolves nakadesisyon na nga mag-free agent karong Hulyo.

Si Gay na-injured niadtong Enero 8, 2017 sa dihang nagduwa pa siya uban sa Sacramento Kings, apan nakahimo gihapon pagpirma og kontrata sa Spurs atol sa off-season.

Sa 57 niya ka duwa sa Spurs, si Gay mi-average og 11.5 points, 5.1 rebounds ug 1.3 assists bisan og limitado lamang siya sud sa 21 minutos matag duwa.

Sa ikaduhang hugna sa miaging playoffs diin gikabangga sa Spurs ang Golden State Warriors, si Gay mi-average og 12.2 points, 5.6 rebounds, 2.2 assists ug 1.6 steals.

Sama ni Gay, bangko sab si Crawford sa Timberwolves, apan  nindot nga mga numero ang iyang gikulit. Mi-average siya og 10.3 points, 1.2 rebounds ug 2.3 assists.

Sulod sa lima ka duwa sa playoffs batok sa Houston Rockets, si Crawford mi-average og 11.8 points, 2.6 rebounds, 2.4 assist ug 1.0 steals.

Ang 38-anyos nga si Crawford tulo ka higayon nga nahimong 'Sixth Man of the Year', usa uban sa Atlanta Hawks, ug duha uban sa Los Angeles Clippers.