Evangelista, Callera MOS awardees

MANILA, Philippines — Pinangalanang Most Improved Swimmers sina Aishel Cid Evangelista (male) at Richelle Ann Raine Callera (female) na ginanap sa Philippine Swimming League Awards Night matapos ang kanilang impresibong ipinamalas sa nakalipas na taon.

Sa tatlong international tournaments na nilahukan ni Evangelista ay humakot siya ng 12 ginto, apat na pilak at isang tanso kalakip ang pitong rekord at tatlong Most Outstanding Swimmer awards.

Nakasungkit si Evangelista ng anim na ginto at isang pilak tampok ang anim na bagong meet records para tanghaling MOS sa SICC Invitational Swimming Championship sa Singapore noong Agosto.

Humirit din si Evangelista ng limang ginto, dalawang pilak, isang tanso at isang bagong rekord sa pagkopo ng MOS trophy sa Buccaneer Swimming Championship sa Tokyo, Japan noong Oktubre, habang nagwagi siya ng isang ginto, isang pilak at MOS sa Singapore Asean Midget Meet noong Setyembre.

Anim na PSL National Series ang nilahukan ni Evangelista kung saan nagrehistro  siya ng 11 bagong marka sa kanyang dibisyon.

Sa kabilang banda, nagwagi naman si Callera ng pitong ginto at isang pilak sa SICC Invitational Swimming Championship sa Singapore; dalawang ginto at isang tanso sa Singapore Asean Midget Meet; at tatlong ginto, dalawang pilak at isang tanso sa Buccaneer Swimming Championship sa Tokyo, Japan.

Itinanghal na Coach of the Year si Albert Sermonia matapos dalhin ang Diliman Preparatory School swimming team sa siyam na overall championship titles sa PSL National Series.