Laurente, Anduyan sinuwerte agad

MANILA, Philippines — Dalawang bagitong boxers ang masuwerteng umusad sa second round ng walang kahirap-hirap matapos ang isinagawang draw kahapon sa ASBC Asian Confederation Youth Boxing Championships sa Indoor Stadium of Huamark sa Bangkok, Thailand. 

Pasok na agad sa susunod na yugto sina Criz Russu Laurente sa boys’ light flyweight (46-49 kg.) at Milenino Anduyan sa boys’ flyweight (52 kg.) sa torneong nilahukan ng mahigit 200 boxers mula sa 30 bansa.

Makakalaban ni Lau­rente sa second round si Yhlas Lylychjanov ng Turkmenistan na nakahirit din ng opening round bye habang sasagupain ni Anduyan si Jung Jihoon ng South Korea na umani rin ng bye.

Maliban kina Laurente at Anduyan, susuntok din si Children of Asia gold me­dalist Criztian Pitt Laurente sa boys’ bantamweight (56 kg.) division.

Makakalaban ni Criztian Pitt si Reo Nishioka ng Japan sa first round.

Ang magwawagi kina Criztian Pitt at Nishioka ang haharap kay Ahmadi Hasibullah ng Afganistan na nakakuha ng first round bye.

Pakay ng tatlong Pinoy boxers na makahirit ng tiket sa pretihiyosong 2018 Youth Olympic Games na gaganapin sa Buenos Aires, Argentina sa Oktubre.