Cavs sa East finals

CEBU, Philippines - Gikompleto  sa  Cleveland  Cavaliers  ang  ilang 4-0 sweep sa Toronto Raptors pinaagi sa pagdaog sa iskor nga 109-102 aron moabante sa NBA Eastern Conference finals kagahapon didto sa Air Canada Center sa Toronto.

Si LeBron James miratsada og 35 puntos, siyam ka rebounds ug unom ka assists, samtang si Kyrie Irving miiskor og 27 uban ang siyam ka assists sa Cavs.

Uban sa pagmaya sa Cavs, si James mitikang sab sa NBA East finals sa ikapitong sunod-sunod nga higayon.

Si Kyle Korver midugang og 18 puntos aron pagtabang sa Cavs nga mamahimong labing unang team nga midaog og walo ka sagunson nga duwa sa playoffs usa ka tuig human kini nakampiyon.

Misalida sab si Channing Frye uban ang 10 puntos alang sa Cavs nga mipasud og 16 sa 41 nila ka tres aron pagbugha sa Raptors nga miduwa nga wala ang All-Star point guard nilang si Kyle Lowly. Sunod nilang sangkaon ang modaog sa serye tali sa Washington Wizards ug Boston Celtics nga kasamtangan karong nagtabla, 2-2.

Nangu sa Raptors mao si Serge Ibaka bitbit ang 23 puntos, samtang si DeMar DeRozan adunay 22 puntos.

Didto sa Verizon Center sa Washington DC, si Bradley Beal mipatuasik og 29 puntos alang sa Wizards nga milusad og 26-0 run sa ikatulong kuwarter aron pagpaluhod sa Boston Celtics, 121-102 ug pagtabla sa ilang serye, 2-2.

Si John Wall midugang og 27 puntos ug 12 ka assists sa Wizards nga alkansi og singko puntos, 48-53 sa wala pa nanginit. Ang bangis nga pagresbak sa Wizards kalit lang nakahatag kanila og 21 puntos, 72-53 sa nahabiling singko minutos sa ikatulong kuwarter.

Si Isaiah Thomas dunay 19 puntos alang sa Celtics, apan namugnaw kini sa second half.

Sa laing aksiyon didto sa Toyota Center, si James Harden mitali og 28 puntos ug si Eric Gordon dunay 22 puntos sa dihang gibaslan sa Houston Rockets ang San Antonio Spurs, 125-104, aron pagtabla sab sa ilang serye sa tagurha ka duwa.

Dominado sa Rockets ang duwa gikan sa pagsugod ug nagpauwan og 3-point shots aron pagtumba sa Spurs nga nanikaysikay ning higayona nga wala ang naangol nilang star guard nga si Tony Parker. (BANAT NEWS)