Hontiveros naghuna-huna na’g retiro

CEBU, Philippines - Gitimbang-timbang karon ni Alaska Aces veteran Dondon Hontiveros ang posibleng pagretiro na niya sa PBA human sila napakyas pagsakmit sa All-Filipino Cup title batok sa San Miguel Beermen niadtong Miyerkules.

Ang 37-anyos nga si Hontiveros wala pa makadaog og titulo sa All-Filipino Cup  sud sa 16 ka tuig niya sa PBA ug higayon na unta alang kaniya ang  miaging finals.

Si Hontiveros gusto unta nga moretiro nga magbilin og  Philippine Cup title sa Alaska, apan daw buot na usab siyang moretiro tungod usab sa taas niya nga edad diin gusto niyang hatagan og kahigayonan ang mga batan-ong players sa Alaska.

“Emotionally, I would say, that after the end of the season, I’ll retire. I’m emotionally drained, pero who knows?” matud pa ni Hontiveros atol sa press conference human sa ilang 89-96 nga kapildihan sa Game-7 niadtong Miyerkules.

Giklaro hinuon ni Hontiveros nga moduwa gihapon siya sa mosunod nga duha ka conference -- ang Commissioner’s Cup ug Governors’ Cup diin nanghinaut siya nga makabawi ang Alaska human sa sakit  nga kapildihan. (BANAT PALARO)