Nabihag sa Lakers

CEBU, Philippines - Mihimo og season-high 38 puntos si Kobe Bryant lakip na niini ang pito niya ka three-pointers alang sa  Los Angeles Lakers nga miputol sa ilang 10-game losing streak human  modaog batok sa Minnesota Timberwolves, 119-111 sa National Basketball Association kagahapon didto sa Staples Center sa Los Angeles, Cal.

Si Lou Williams midugang og 20 puntos alang sa Lakers, kinsa nakalihay sa ila untang labing taas nga losing streak  sa kasaysayan sa ilang franchise.  

Mao na kadto ang unang daog sa Lakers sukad niadtong Enero 12.

Human molabaw ang Timberwolves sa naghinapos na ang oras,   si Bryant mihimo’g ‘back-to-back’ triples  nga maoy naghatag sa Lakers og labaw sa katapusang 5:02 ang oras sa duwa. Siya sab maoy nanag-iya sa 14 sa 18 puntos nga nahimo sa Lakers sa fourth quarter.

Si Andrew Wiggins maoy nangu sa Timberwolves nga midaro og 30 puntos. 

Sa laing duwa,  ang Houston Rockets mipukan   sa Miami Heat, 115-102  sa pagpangulo ni James Harden nga miratsada og 26 puntos ug mitabla sa iyang career-high nga 14 ka assists.

Si Luol Deng miposa og 17 puntos alang sa Heat kansang four-game win streak natapos didto sa Toyota Center, ang korte sa Rockets.

Sa lain pang mga duwa, si Kyle Lowry mibahog og 26 puntos lakip ang lima ka three-pointers, samtang  si DeMar DeRozan adunay  22 puntos  aron tabangan ang Toronto Raptors aron  masuhong ang coaching debut ni Phoenix Suns interim coach Earl Watson.

Ang Raptors midaog sa iskor nga 102-97.

Si Markiff Morris maoy nangu sa Suns sa iyang 30 puntos ug 11 ka rebounds. 

Ang Boston Celtics  midaog sab batok sa New York Knicks, 97-89  pinaagi sa 20 puntos ni All-Star reserve Isaiah Thomas.

Si Arron Afflalo maoy nangu sa Knicks sa iyang 18 puntos, samtang si Robin Lopez miamot og 17 puntos ug si Carmelo Anthony mituhog og 16 puntos. 

Ang Portland TrailBlazers midaog batok sa Milwaukee Bucks sa iskor nga 107-95. 

Si CJ McCollum miburak og 30 puntos ug   si Damian Lillard adunay 14 puntos alang sa Blazers. Si Khris Middleton mirehistro og 21 puntos uban sa walo ka rebounds alang sa Bucks. (BANAT NEWS)