UV misakiyo sa CYBL U15 title

CEBU, Philippines - Giangkon sa University of the Visayas (UV) ang ikaduha nilang championship trophy sa Cebu Youth Basketball League human nila gipukan ang Cebu Eastern College (CEC), 51-47  alang sa  Under 15 championship didto sa Lux Oriens Gym sa Sacred Heart School-Ateneo de Cebu sa Canduman, Mandaue City. 

Dili sayon ang daog tungod kay mihimo og rally sa final period ang CEC. Human  miposte og 23-19  nga bentaha sa halftime, ang UV miinat sa labaw ngadto sa 37-23 sa third period sa pagpangulo ni Royce Alforque kinsa mitapos sa duwa dala ang 14 puntos.

Apan wala misurender ang CEC  diin milusad sila og  scoring run  aron makan-an  ang labaw sa dos puntos, 47-49 human sa tres ni Vhan Joshua Baruc. Dali hinuong nakarekober ang UV sa  panagtambayayong  nilang Alforque ug Osias Padilla.

Kini ang ikaduhang titulo sa UV human usab nila gisakmit ang kampiyonato sa under 10 division.  (BANAT PALARO)