Jonher Espina, MVP sa Alchemai Friendship Cup

CEBU, Philippines – Gipamatud-an ni Jonher Espina nga siya ang angay nga pilion isip MVP gumikan kay bisan og gidemalas nakapakita gihapon siya og maayong performance alang sa J. Espina Agrivet nga mipilde sa Finthel, 77-66 aron pagsakmit sa kampiyonato sa Alchemae League Friendship Cup 2015 basketball tournament niadtong Disyembre 21 sa gabii didto  sa  Pope  John Seminary gym sa Mabolo, dakbayan sa Sugbo.

Kanhi CIT-U Wildkittens, si Espina mitala og 13 puntos ug mihimo’g lima ka assists, tulo ka rebounds ug duha ka steals nga maoy nakakabig sa organizers pagpili kaniya nga conference MVP.

Hinuon, si Sherwin Tagalog maoy topscorer sa J. Espina Agrivet nga mipupo og 14 puntos.

Wala sab kapugngi silang Julo Tudio ug Totoy Miñoza nga parehong miantog og 12 puntos alang sa J. Espina Agrivet ni team owner Jojie Espina.

Ubos sa pagtimon ni coach Johnny Dieta, ang J. Espina Agrivet maoy midiktar sa duwa gikan sa pagsugod ug wala gyud nila patilawa’g labaw ang Finthel.

Labaw  og sayes puntos sa halftime, 38-32, apan ang J. Espina Agrivet wa’y hunong nga mipatuasik og mga puntos sa third period aron inaton ang ilang labaw ngadto sa 63-51 paingon sa final period nga nag-iwag sa ilang dalan ngadto sa kadaugan.

Si Werdy Lopez miambit og 11 puntos alang sa J. Espina Agrivet nga nakatigum na og daghang championship trophies sa nagkalain-laing torneyo dinhi sa Sugbo.

Puntos Matag Usa

J. ESPINA AGRIVET (77) – Tagalog 14, Espina 13,  Tudio 12, Miñoza 12, Lopez 11, Ceniza 9, Pagasi-an 2, Dela Cerna 2, Sesa 2.

FINTHEL (66) – Solitario 19, Getaruelas 10, Desohinto 10, Blanco 6, Malalay 6, Dela Cerna 5, Bantulay 4, Lanutan 2, Sonsona 2, Bantulay 2. (BANAT NEWS)