Cebu Movers kampiyon sa Game On

CEBU, Philippines – Yanong gipilde sa Cebu Movers System, Inc. (CMSI) ni playing coach Dr.  Boy Te ang mas teamwork ug mas batan-on nga Boss John sa usa ka low-scoring finals, 51-39 aron modaug sa titulo sa inaugural tournament nga gitawag og GAME ON: "Warriors Cup" kagahapon didto sa Cebu Coliseum.

Sa samang paagi, na-sweep sab sa Cebu Movers ang torneyo sa ilang 5-0 nga baraha.

Si Aries Magdales maoy nangu sa Cebu Movers sa iyang 15 puntos ug kadaghan niini didto sa second quarters ug third quarter. Si Magdales kinsa maoy bugtong player sa Cebu Movers nga nakahimo'g double figures, mao sab ang napili nga MVP.

Naglabaw ang Boss John og labing menos nuybe puntos sa sayong bahin sa first quarter apan mihimo'g 8-0 run ang Cebu Movers pagsugod sa second period aron masakmit ang labaw, 17-16 may 4:40 ang oras sa basket ni Christian Palima.

Kalit lang mibali ang huyop sa hangin dihang misulod si Magdales sa second period diin mihakot siya'g sagunson otso puntos. Gisugdan og lubong sa Cebu Movers ang Boss John ni team leader Aldred Du ug playing coach Gio Boy Seno human sa split charities ni Palima, 32-22.

Gikan niadto, wala na nakasustenir ang Boss John ilabi na kay medyo nahimo nang pisikal ang duwa didto sa fourth period.

Silang Dustin Yao ug Du maoy nangu sa Boss John sa ilang 11 ug 10 puntos matag usa.

Sa sayo pa, midaog ang Shohuko 5.0 batok sa Cebu Bai.com, 83-80 alang sa ikatulong pwesto.

Lima ka players sa Shohuko ang mihakot og double figures pinangulohan ni Joseph Jayme kinsa maoy mahimong 3-pt king tungod sa iyang nahipos nga siyam ka three-pointers sa usa ka buwan nga lega.

Si Roque Tamayo maoy nangu sa Cebu Bai.com sa iyang 29 puntos ug midugang si Roger Tauza og 25 puntos.

Silang Magdales, Lester Dajao, Bryan Mendoza, Ian dela Fuente ug Du ang milangkub sa Mythical five.

Puntos matag usa:

First Game:

Shohuko 5.0 (83) – Jayme 24, Dy 18, Mendoza 16, Siason 12, Saavedra 10.

Cebu Bai.com (80) – Tamayo 29, Taunza 25, Tarranza 12, Ponce 8, Dela Fuente 5.

Second Game:

CMSI (51) – Magdales 15, Palima 9, Dajao 9, Mauro 8, Oporto 7, Doblas 2.

Boss John 39) – Yao 11, Du 1-,Padillo 5, Millan 5, Lim 5, Lim 4, Trinidad 2. (BANAT NEWS)