Mavs mipukan sa Knicks

CEBU, Philippines – Mipatuasik og 25 puntos si Dirk Nowitzki ug milangkat og unom  ka rebounds aron pangulohan ang Dallas Mavericks ngadto sa ilang 104-97 nga kadaugan batok sa New York Knicks sa National Basketball Association kagahapon  didto  sa Madison Square Garden sa New York City.

Ang Latvian rookie nga si Kristaps Porzingis, kinsa nag-idolo kang German star nga si Nowitzki dihang bata pa siya, maoy nangu sa Knicks sa iyang 28 puntos, apan dili kadto igo nga makapukan sa Dallas.

Si Porzingis  nga may gitas-on nga 7-foot-3, usa sa mga labing maayong rookies karon nga season ug siya maoy nagpasikit sa Knicks ngadto sa kuwatro puntos,  97-101 sa nahabiling 43 segundos sa duwa.

Ang handumon untang comeback kalit lang nahanaw tungod kay gipakita sa Mavericks ang ilang katakus ug silang Nowitzki ug Deron Williams maoy nagtuboy ngadto sa kadaugan. 

Si Williams miposa’g 20 puntos uban ang pito ka assists.

Gawas sa iyang puntos, si Nowitzki, mihimo sab og unom ka rebounds.

Si Porzingis mihimo’g 13 of 19 shots gikan sa field ug may duha ka blocks.

Ang iyang teammate nga si Carmelo Anthony miamot og 17 puntos uban ang walo ka assists ug pito ka rebounds.

Didto sa Charlotte, gilubong sa Hornets ang Detroit Pistons, 104-84 ug gikulata sa San Antonio Spurs ang Philadelphia Sixers sa iskor nga 119-68.

Ang Washington Wizards mipilde sa Miami  Heat  sa  iskor nga 114-103 didto sa American   Airlines Arena.

Gipakuratan sab sa Milwaukee Bucks ang Portland TrailBlazers, 90-88.

Ang sentro sa Hornets nga si Cody Zeller maoy topscorer sa iyang 20 puntos. Ang Hornets nagduwa nga wala ang bigman nga si Al Jefferson tungod sa calf injury.

Midaog sab ang Toronto Raptors batok sa Los Angeles Lakers sa iskor nga 102-93.

Si Kyle Lowry miiskor og 27 puntos, samtang si Terrence Ross midugang og 22 ug si Bismack Biyombo  mihimo’g career-high 15 puntos ug 13 ka   rebounds alang sa Raptors. (BANAT NEWS)